BAGUIO CITY – Nainget nga ipalpalagip manen ti lokal a gobyerno ti Baguio kadagiti accommodation establishments ditoy siudad ti panangikalikagumda iti panagdalan iti Central Triage dagiti agbalin a kliyente dagitoy.
Kasaruno daytoy ti naduktalan a panaglabsing ti maysa a turista iti entry protocol gapu iti dagus a panagturongna iti maysa a hotel ditoy siudad.
Naduktalan iti imbestigasyon ti City Health Services Office (CHSO) nga idi June 29 ket nagturong ditoy siudad ti tallo a turista manipud Pangasinan ken idi addadan iti border checkpoint ket imbilin ti agbambantay iti checkpoint a mabalindan nga agturong iti hotel a pagdagusanda.
Nupay kasta, nagturong ti dua a turista iti Central Triage bayat a nagdiretso iti nasao a hotel ti kadwa dagitoy.
Apaman a nakasangpet iti nasao a hotel ti nasao a turista ket nakiddaw ti pammaneknek a dimmalan daytoy iti Central Triage ngem awan ti naipakitana a dokumento isut gapuna nga imbilin ti personnel ti hotel ti panagturongna iti Central Triage.
Naduktalan sadiay ti panagpositibo ti nasao a turista babaen iti resulta ti antigen test isut gapuna a pinagsublida sadiay Pangasinan.
Iti agdama, mabambantayan ti kasasaad ti dua pay a turista nupay saan dagitoy a nagpositibo iti COVID-19.
Inyunay-unay manen ni Dr. Celia Flor Brilliantes, assistant city health officer ti pagkasapulan iti panagdalan dagiti turista iti Central Triage sakbayda nga agturong iti hotel a pagdagusan dagitoy.
