Inawagan ni House prosecution panel spokesperson ken Lanao del Sur Rep. Zia Alonto Adiong nga “ironic” ti panagdanag ni Vice President Sara Duterte iti siguridadna ken ti pamilya daytoy.
Sigun ken Adiong, saan nga agtunos ti statement ni Duterte iti kasasaadna agsipudta sumangsango kaso a grave threats gapu iti panagpangtana iti biag ni President Ferdinand Marcos Jr., First Lady Liza Araneta-Marcos ken sigud a House Speaker Martin Romualdez.
Innayon ni Adiong nga arigna a biktima ti bise presidente idinto a daytoy ti sumangsango iti kaso seknan iti panagpangta iti biag.
Naobserbaran metlaeng ti mammanday linteg a ti pagsasao ken tignay ni Duterte ket saan a mangipakpakita iti maysa a tao a nakaru ti panagbutengna.
Gapu iti dayta, impetteng ni Adiong a saan a kapapati ti kinuna ni Duterte a nabayag a makaaw-awat iti pangta.
Iti baet dayta, impeksa ni Adiong a rumbeng a seryoso nga imbestigaran dagiti maseknan nga otoridad ti anyaman nga aktuwal a pangta kontra iti bise presidente ken ti pamilya daytoy.
