BAGUIO CITY – Kidkidawen ti ama ti Benguet ti panaggatang dagiti dadakkel a kompanya ti minas a masarakan iti probinsia iti COVID-19 vaccines para kadagiti empleyado dagitoy.
Iti panakiuman ti Bombo Radyo Baguio, kinuna ni Governor Melchor Diclas a para metlaeng daytoy iti kinatalged ti salun-at dagiti empleyado dagiti nasao a kompanya.
Inaklonna nga uray adda ti pondo ti provincial government a panggatang ti COVID-19 vaccines para kadagiti umili ti probinsia ket saan met nga umdas daytoy para iti amin.
Kinunana a gapu iti daytoy ket kidkiddawenda ti tulong dagiti dadakkel a kompanya ti minas iti probinsia kas iti Philex Mines ken ti Lepanto Mines iti panakabakuna met dagiti empleyado dagitoy.
Kabayatanna, dinakamatna a puntirya ti provincial government a mabakunaan ti 60-70 a porsiento iti populasyon ti Benguet isut gapuna nga ikagkagumaanda nga agsapul iti pondo para iti daytoy.
