BAGUIO CITY – Imbilin ni Itogon Mayor Victorio Palangdan babaen iti maysa a resolusion ti panaggatang ti bakuna kontra COVID19 dagiti dadakkel a kompanya ti minas iti masakupanna a lugar.
Iti panakiyuman ti Bombo Radyo Baguio, impettengna kadagiti mining companies ti panagpabakuna dagiti empleyadoda karaman dagiti pamilya dagitoy.
Inlanadna pay iti resolusion ti balakadna a saan pay a makipaset dagiti kompanya iti panagnumar ti publiko iti bakuna nga agtaud iti gobierno ngem ketdi urayenda ti panakaipalubos ti panaggatang dagiti pribado a kompanya iti bakuna.
Inlawlawagna nga ado kadagiti residente ti munisipyo ti interesado nga agpabakuna ngem limitado laeng ti suplay.
Kabayatana, naragsakan ti mayor iti naobserbaranna a nangato a vaccination acceptance rate ti umili dagitoy isu’t gapuna a nagsurat iti probinsial a gobierno ti Benguet tapno agkiddaw iti kanayunan a suplay dagiti bakuna.
