BAGUIO CITY – Agtaltalinaed ti takder wenno polisiya ti mayor ti siudad ti Baguio a panakaipawil ti panagilako kadagiti pailaw ken paputok.
Impetteng daytoy ni Mayor Mauricio Domogan iti naangay a press conference ti Department of Health a nangiyusuat iti Oplan Iwas Paputok.
Sigun kenkuana, legal man wenno saan ket ipawilna latta ti panagilako kadagiti nasao a banag gaputa mangitunda laeng dagitoy iti disgrasya.
Kagiddan iti daytoy ket imbilinna ti panangkumpiskar dagiti pulis kadagiti mailaklako a pailaw ken paputok ditoy siudad.
Kabayatanna, binabalawna ni Mayor Domogan ti lokal a gobyerno ti Tuba, Benguet gapu iti panangipalubosda iti panakailako dagiti pailaw sadiay.
Sigun met iti Police Regional Office Cordillera, addan dagiti nagsumitir kadakuada ti aplikasyon para iti panagilakoda iti paputok partikular sadiay Abra, Ifugao ken Kalinga.
