Indagadag ni Senador Ronald “Bato” dela Rosa idi kalman iti House Quad Committee (QuadComm) nga agpokusda iti panagimbestigar iti panagsaknap dagiti krimen iti Pilipinas imbes nga ibalud dagiti sigud ken agdama nga opisial nga agserserbi iti daga iti naimbag a panggep.
Sigun kenni Senador Dela Rosa, ti imbestigaran kitdi ti QuadComm ket dagiti insidente a mapaspasamak, ken nu kasano nga umad-adu ti kriminal a napigsa ti pakinakemda a mangpaltug kadagiti kameng ti pulisia, saan a dagiti kameng ti pulisia nga agserserbi iti nasayaat.
Dinakamat ti nasao nga opisial ti kaso ni sigud a Philippine Drug Enforcement Agency (PDEA) chief Wilkins Villanueva, a na-cite in contempt seknan iti saanna a panagsungbat kadagiti damag bayat ti panagdinggeg ti QuadComm idi Disiembre a dose.
Inaramid ni Abang Lingkod party-list Representative Stephen Paduano ti mosion kalpasan nga inulit-ulit nga inlibak ni Villanueva ti pannakairamanna iti mapapati a warrantless a pannakakemmeg ni Jed Sy, asawa ni drug personality Allan Sy, agarup dua a dekada ti napalabas.
Patien ni Senador Dela Rosa a pimmigsa dagiti kriminal, drug pushers, drug lords gaputa awanen ti pagbutnganda, ken saanda a mabuteng kadagiti otoridad gaputa dagitoy ket inipit ida dagiti kameng ti QuadComm.
