Agparparang a maysa kadagiti kangrunaan a rason iti panagdinnangran dagiti agassawa wenno aglive-in partner ket ti panagimon, ken ti panagatap nga addaan ti sabali a karelasyon ti maysa kadagiti agpartner.
Gapu iti dayta, nagpalagip ni Police Major Harriet Bulcio, panakangiwat ti Baguio City Police Office nga adda ti legal a proseso a mabalin nga aramiden dagiti agpartner tapno marisut dagiti pakaseknan dagitoy iti relasyonda.
Daytoy ket tapno maliklikan ti panangdangranda iti tunggal maysa wenno panakapasamak ti anyaman a krimen.
Daytoy ket kalpasan ti napasamak nga agsasaruno nga insidente ti panangdangran iti nagbaetan dagiti agpartner iti siudad ti Baguio kadagiti napalpalabas nga aldaw ken lawas.
Karaman dita ti napasamak nga uram idiay Purok 7, Sunnyside, Brgy. Fairview, Baguio City nu sadino maatap a panagimon ken panakaunget ti rason nu apay nga inaramid ti suspek ti panag-uram ti pagtaengan; ti panakaputed ti mabagbagi ti maysa a lalaki idiay Balenben, Irisan, Baguio City; ken ti kaudian a kaso ti pammaltog idiay Bakakeng Drive, Bakakeng, Baguio City.//Bombo Rob Dominguez
