BAGUIO CITY – Nainget a konkondenaren ti Baguio Flower Festival Inc. (BFFI) ti panagkampanya dagiti kandito nga agngay-ngayangay iti pwesto kadagiti nagduduma nga events ti Panagbenga Festival 2022.
Sigun kenni BFFFI Chief of Staff Evangeline Paino, saan a rumbeng nga aramaten dagiti kandidato iti panagkampanyada dagiti venues a pakaisayangkatan dagiti nagduduma nga aktibidad para iti month-long celebration ti Panagbenga
Kinunana a mabalin met nga agkampanya dagitoy ngem saan a kadagiti pakaipatpatungpalan dagiti aktibidad.
Inlawlawagna a daytoy ket gaputa saan a political events ti petibidad no ketdi maysa daytoy a cultural event.
Impettengna ti saanda a panangkanunong a malaukan ti political campaigning ti selebrasyon tapno napintas ti pannakaipatungpal daytoy.
Gapu iti dayta, kiniddawna ti kooperasyon dagiti kandidato a saanda kuma nga agkampanya kabayatan ti pannakaipatungpal dagiti aktibidad.
Innayunna pay a mabalin met nga agturong dagiti kandidato kadagiti events para iti panagbuyada ngem saanda a mabalin nga agiwaras ti campaign materials ken saanda a mabalin a mangisawang ti adda pakainaiganna iti politika.
Kabayatanna, kiniddaw metlaeng ni sigud a mayor ti siudad ken Chairman for Life ti BFFI a ni Atty. Mauricio Domogan ti tulong manipod iti media para iti panangipablaakda dagiti kandidato a mangaramat ti panagbenga festival iti panagkampanya dagitoy.
Kinunana a saan a maikari dagiti kandidato a managaramat kadagiti aktibidad ken saan a rumbeng a maipatugaw dagitoy iti pwesto.
Kiniddawna metlaeng ti kooperasyon dagiti kandidato tapno naannayas ti pannakaipatungpal ti makabulan a selebrasyon dagiti aktibidad iti Panagbenga Festival.
