BAGUIO CITY – Iyap-apela ni Benguet Governor Melchor Diclas ti panagkaykaysa dagiti amin a mayor dagiti 13 a munisipyo ti probinsia para iti in-inot a panakailukat ti turismo kadagiti turista nga agtaud iti dadduma a probinsia ken rehiyon.
Iti panakiyuman ti Bombo Radyo Baguio, kinunana nga umanamong met daytoy iti in-inot a panakailukat ti turismo la ketdi nainget a masurot dagiti health protocols kontra iti COVID-19 tapnu maliklikan iti panagwaras ti nasao a sakit.
Inyunay-unayna a maawatanna met ti pakaseknan dagiti dadduma a mayor iti probinsia no apay a saanda pay nga ilukat ti turismoda iti publiko.
Nupay kasta, impetteng ni Gov. Diclas a nasaysayaat latta no in-inot a mailukat ti turismo iti probinsia gaputa makatulong daytoy iti panakabiag manen ti ekonomiya ti Benguet bayat a maur-uray ti maaramid a bakuna kontra iti COVID-19.
Maipalagip a naglukaten ti turismo ti Kapangan, Itogon, Tublay ken La Trinidad para laeng kadagiti residente dagitoy.
