Intuding ti International Criminal Court (ICC) ti panagrugi iti panagkeddeng iti kaso ni sigud a president Rodrigo Duterte seknan iti sangsangwenna a crimes against humanity inton Nobyembre ita a tawen.
Iti surat a naisumitir idi Mayo 15, kinuna ti prosekusyon a namnamaenda a malpas aminen ti kasapulan a maisagana sakbay a malpas ti Septembre iti agdama a tawen.
Gapu iti daytoy, insingasingda nga inton Nobyembre 30 ita a tawen a pormal a marugian ti panagkeddeng iti kaso ni sigud a president Duterte tapno mapapartak ti panagtulid ti kaso ken maikan ti gundaway dagiti dadduma pay a biktima a makipaset iti proseso.
Iti met benneg ti depensa, inyebkasda ti pakaseknan iti salun-at ni sigud a president Duterte.
Sigun iti baro nga abogado daytoy a ni Peter Haynes, kasapulan a mataming umuna ti sigud a presidente nu kabaelan pay daytoy a sumango iti nasao a panagdengngeg gapu iti ininnot a panagkapsotna.
Innayon pay ti depensa, saan nga umdas ti maudi a panangsukimatda iti medikal a kondisyon daytoy.
Maipalagip nga idi Abril 23, kinumpirma ti nasao a korte dagiti kaso kontra kenni sigud a president Duterte.
Naiyuman meten ti kaso iti Trial Chamber III manipud iti Pre-Trial Chamber 1 kas panagsagana iti sumaruno nga addan iti panangkeddeng.
Sumangsango ti sigud nga opisyal iti tallo a bilang ti murder ken attempted murder kas crimes against humanity gapu iti maatap a panangpapatay a napasamak bayat iti panagtugaw daytoy kas Mayor ken Presidente iti pagilian a Pilipinas. //bombokaren.c.s
