BAGUIO CITY – Isaksakad ti Benguet General Hospital ti panagkolektarda ti parking fees.
Sigun kenni Dr. Ma. Imelda Ulep, Chief of Hospital III ti nasao a pagagasan, maaramat ti makolektar a parking fees iti panakamintinir dagiti kalsada ken pagnaan sadiay.
Kinunana a ti maur-or a pondo ket agbalin a paset ti mapaspastrekan ti Benguet General Hospital ken mailatang inton sumaruno a tawen para iti operasyon ti pagagasan.
Sigun kenkuana, ti singasingda kety P40 ti makolektar para iti umuna a dua nga oras ken kanayonan a P20 iti sumarsaruno nga oras bayat a P200 para iti overnight parking.
Innayona a dumanon iti 54 ti slots para iti pay parking area a masarakan iti hospital compound ken agbalin to a ‘first come, first served basis’.
Dinakamatna pay a mailaksid iti panagbayad iti parking fee dagiti kliyente ken sangaili nga addaan ti opisyal a transaksion iti nasao a pagagasan.
