BAGUIO CITY – Adun ti nakita ti COMELEC-Baguio a campaign posters dagiti kandidato a naipaskil iti nagduduma a lugar iti lokalidad a naglabsing iti linteg kagiddan ti panagrugi ti panagkakampanya para iti barangay ken sangguniang kabataan (SK) elections.
Iti panakipatang ti Bombo Radyo kenni Atty. John Paul Martin, City Election Officer, kinunana nga idi kalman ket adu dagiti nakitada a campaign posters a naipaskil kadagiti poste ti kuryente iti lokalidad.
Kinunana a dagitoy ket panaglabsing iti linteg gaputa saan a karaman dagiti poste ti kuryente kadagiti mabalin a pangipaskilan kadagiti campaign posters.
Innayonna a kaaduan pay dagiti campaign posters ti naglabsing iti mandatory provision ti RA 9006 wenno ti Fair Election Act partikular ti panangilanad iti kompleto a nagan ken address ti nagdonar wenno ti mismo a kandidato a nagpaimprenta kadagiti campaign posters.
Impettengna met mabaklas ti campaign material a ti nakalanad laeng ket “this material is donated by friends”.
Kinunana nga adu met laeng ti naglabsing iti mandatory provision a panakailanad iti poster ti paka-ammo a “this material is recyclable” kas panagtungpal iti agdama a linteg iti Solid Waste Management.
Gapu iti daytoy, insingasing ni Atty. Martin ti panang-akas dagiti maseknan kadagiti nasao a campaign posters ken ti panangisuratda iti agkurkurang a detalye tapnu saan dagitoy a mabaklas ken maikonsidera nga iligal ken tapnu saan a makasuan ti maseknan a kandidato.
