BAGUIO CITY – Pagparparikutan ita ti Baguio City Police Office (BCPO) – Station 3 dagiti motorsita nga aglablabsing iti linteg-trapiko iti masakupan ti Land Transportation Office sadiay Pacdal.
Segun kenni PSI Julius Basinga, commander ti BCPO-Station 3, gapu iti kaadu dagiti lugan nga agturturong iti nasao nga opisina ket mangituntunda dagitoy iti nailet a gunay ti trapiko.
Kinunana a mangrugi iti alas-otso ti agsapa agingga alas-singko ti malem ket adu dagiti lugan sadiay.
Dinakamatna a gapu iti daytoy ket saan a maliklikan ti panangbaklasda iti plaka dagiti lugan sadiay nangruna no daytoy ket pinanawan ti maseknan a driver.
Innayonna pay nga adda dagiti gundaway a kasarsaritada dagiti driver tapnu agbirok dagitoy iti dadduma a lugar a pagparadaan dagitoy.
