Baguio City – Pinatgan ti lokal a gobyerno ti La Trinidad, Benguet ti 10 nga aldaw a panakailaylayon ti panaglako dagiti cut flower vendors iti public market sadiay Km. 5 agingga inton November 10.
Sigun kenni Mayor Romeo Salda, kiniddaw ti La Trinidad Cutflower Organic Growers Association ti nasao a banag.
Kinunana a maipaay a libre ti pwesto kadagiti cut flower vendors kas tulong ti lokal a gobyerno kadagitoy.
Innayonna a babaen iti daytoy ket makasubbot pay dagiti cut flower growers iti panakalugida ken maipaibusda dagiti sabong a saanda a nalako gapu iti panakaiparikep dagiti kamposanto manipud October 29 agingga November 4.
Maipalagip a sumagmamano a mannalon ti cut flowers ti nangibelleng wenno nangibasura kadagiti inapitda a sabong gapu iti kaawan ti gumatang kadagitoy.
