Dumanon iti 214,267 ti bilang dagiti enrollees iti entero a Cordillera iti umuna nga aldaw ti klase idi kalman, Hunyo 8.
Sigun iti datos ti Department of Education-Cordillera, ti Baguio City ti kangatoan a nakailista iti bilang dagiti nag-enroll iti bilang a 56,074, bayat a ti Ifugao ti kababaan nga addaan iti 11,959 nga enrollees.
Iti pannakiuman iti Bombo Radyo kenni Cyrille Gaye Miranda, Spokesperson ti Department of Education-Cordillera, kinunana a no idilig iti napalabas a tawen, bassit pay laeng ti nairehistro a bilang dagiti enrollees.
Nupay kasta, mabalin a gapu daytoy iti saan pay a pannakaipasa dagiti sumagmamano a private schools iti kumpleto a datos ti enrollment-da.
Impalagip met ni Miranda a libre ti panag-enroll dagiti estudyante ken awan ti aniaman a bayadan para iti daytoy.
Kasta met a imbinglay iti ragsak iti DepEd-CAR gapu iti naurnos ken natalged a panaglukat ti klase idi kalman.
Innawisna pay dagiti nagannak dagiti ubbing a saan pay a naka-enroll ta mabalin pay a humabol iti panag-enroll iti daytoy a lawas. //Bombo Khey
