Simmarungkar ita nga aldaw ni Police Brigadier General David Peredo Jr.,Regional Director iti Police Regional Office-Cordillera idiay Baguio City Public Cemetery.
Kadwa ni Peredo a nagrikus iti nasao a sementeryo da Deputy Regional Director for Operations Police Colonel Elmer Ragay, Baguio City Police Office-City Director Police Colonel Ruel Tagel ken dadduma pay a police personnel iti Baguio City.
Iti panakiuman ti Bombo Radyo kenni Peredo, impeksana ti kumpiansana iti nagbalin a panagsagana dagiti kameng ti pulisya para iti All Souls’ day ken All Saints’ Day.
Innayonna a naan-anay ti panakaadal ken panagsagana dagiti pupulis rason nga awan ti makitkitana a parikut seknan iti linak kadagiti sementeryo ken kinatalged dagiti sumarungkar.
Malaksid iti dayta, kumpiansa metlaeng ti Regional Director iti panag-adu dagiti sumangbay nga indibidwal iti nasao a sementeryo ita nga aldaw iti baet a napasaran ti panagarbis itay agsapa.
Kabaytaanna, nagturong metlaeng daytoy ken dagiti daduma pay a kameng iti pulisya iti nagduduma a sementeryo iti Baguio City pakairamanan ti Baguio Memorial Cemetery, Paradise Garden Memorial Park ken Pyramid Memorial Park idiay Kias, ken ti Heaven’s Garden Memorial Park ken Loakan Public Cemetery idiay Loakan, Benguet.//Bombo Jez Lapizar
