BAGUIO CITY – Inlawlawag ti mayor ti Mankayan, Benguet ti panakailista iti doble a bilang wenno ti kilaat a panagngato ti kaso ti COVID-19 sadiay partikular iti mining camps.
Iti interbyu ti Bombo Radyo Baguio kenni Mayor Frenzel Ayong, kinunana a resulta daytoy ti contact tracing nga insayangkatda kadagiti immunan nga pasyente iti COVID-19.
Sigun kenkuana, nangrugi daytoy kalpasan a nagpositibo ti maysa a minero no sadino nakarikna daytoy iti sintomas idi November 9.
Gapu iti daytoy, dagus a nangisayangkatda iti contact tracing kadagiti nakapulapol ti minero agingga a nanayunan dagiti nagpositibo iti uneg ti Mining Camp ken nailista ti 17 a kaso ti COVID-19 sadiay idi kalman.
Imbilinna ti dagus a lockdown kadagiti bunkhouses kasta pay a nalimitaran dagiti rumwar nga indibidual iti tunggal balay.
Nakanselar pay ti panagbiahe dagiti public transportation sadiay Mankayan kas paset ti addang tapno maliklikan ti panagwaras ti virus.
Dinakamatna pay nga maipawil paylaeng dagiti outsiders nga umuneg iti mining camp agingga a saan a maipatungpal iti aggresive testing kadagiti minero kasta met a naibilin ti posible nga alternate work schedule iti nao a pagminasan.
Maibasar iti rekord manipud iti Benguet Provincial Health Office, nailista ti walo a baro a kaso ti COVID-19 sadiay Millsite, saggaysa sadiay San Antonio, San Roque ken Lower La Guerta iti Barangay Paco ken innem sadiay Marivic iti Barangay Sapid.
