BAGUIO CITY–IMPANAMNAMA dagiti opisyal ti Land Transportation Franchising Regulatory Board (LTFRB) central office nga umatendar dagitoy iti sesyon ti lokal a gobyerno ti siudad ti Baguio.
Daytoy ket para pay laeng iti panakailawlawag ti implementasyon ti taxi fare rate ditoy lokalidad nga immunan a naka-awat iti adu a pammabalaw gapu iti kinangina daytoy.
Segun kenni Vice Mayor Edison Bilog, kiniddaw dagiti representante ti LTFRB Central Office a mailaylayon pay ti nasao a panagdengeg gapu iti adu a pakakumikuman dagitoy.
Nupay kasta, kinunana nga inkari met dagitoy ti panagatendarda iti sumaruno a sesyon ti council.
Maipalagip nga immunan nga inaprobaran ti lokal a konseho ti maysa a resolusyon a mangkidkiddaw iti panagparang dagiti opisyal ti LTFRB- Central Office tapnu mailawlawag dagiti nagbalin a basaran dagitoy iti taxi fare rate ditoy lokalidad.
