BAGUIO CITY – Ibalbalakad ti Baguio City Health Services Office ti panagparehistro dagiti karaman iti kategorya ti A4 a mabakunaan kontra iti COVID-19 ditoy siudad.
Sigun kenni City Health Officer Dr. Rowena Galpo, sakupen ti nasao a kategorya dagiti essential workers, uniformed personnel, dagiti frontline workers kadagiti para-publiko ken pribado a media outfit ken financial services.
Karaman pay iti nasao a kategorya dagiti agtatrabaho iti sektor ti transportasyon, kadagiti merkado publiko, groserya, delivery services, pagaramid kadagiti taraon, inumen, agas ken dadduma a pharmaceutical products, kadagiti panganan, hotels ken accommodations, dagiti religious leaders, dagiti gwardia ken dadduma pay.
Kinunana a manarimaan ita ti panagparehistro dagiti workers a karaman iti nasao a kategorya.
Kabayatanna, imbinglay ni Dr. Galpo nga agtultuloy latta ti panagbakunada kadagiti health workers a saan pay a nabakunaan ken dagiti senior citizens iti kategorya ti A2.
Nupay kasta, kinunana a saan pay a maituloy ti panagbakunada kadagiti adda iti kategorya ti A3 wenno dagiti persons with commorbidities gaputa saan pay a nalpas dagiti senior citizens.
Maipalagip a puntirya ti lokal a gobierno a gun-uden ti herd immunity agingga nga agleppas ti agdama a tawen.
