Impeksa iti maysa nga indibidual a napateg ti panagrehistro gaputa nakadepende ditoy ti masakbayan iti pagilian a Pilipinas.
Iti pannakiuman iti Bombo Radyo Baguio iti maysa kadagiti nagparehistro itay agsapa iti COMELEC-Baguio, kinunana nga iti oras a sumango iti pagilian iti krisis, dagiti ibotos dagiti umili ti manamnama a mangipaay iti solusion.
Gapu iti daytoy, no saan nga agbutos dagiti tattao ken agreklamo laeng, saan koma a pakasdaawan no agtalinaed a kas iti sigud ti kasasaad.
Ginuyugoyna pay itay agsapa ti amin nga agparehistro tapno maaddaan iti gundaway a makapili iti rumbeng nga agtugaw iti puesto.
Innayonna pay a naapektaran daytoy kadagiti napasamak iti Senado ken patienna a saan a “deserve” dagiti Pilipino ti agdama a kasasaad iti Pilipinas.
Sigun pay kenkuana, dagiti opisial iti Senado ket rumbeng nga agserbi a panggwadan ken mangipaay iti solusion kadagiti pakaseknan iti pagilian, ngem iti agdama ket kasla dagitoy pay ti mapapati nga agbalbalin a paset iti problema iti pagilian.
