BAGUIO CITY – Kabaelan ti armada pwersa ti Piliipinas a mangparmek iti Maute terror group a mangisaksaknap ita iti panagriribuk ken kinaranggas sadiay Mindanao.
Impeksa daytoy ni Col. Prudencio Asto, dadaulo ti 1st Benguet Ready Reserve Battalion iti panakiyuman kenkuana ti Bombo Radyo.
Kinunana a no kapabilidad ken armas ket nalaka a maparmek ti tropa ti gobyerno ti nasao a terror group nangruna ita a moderno dagiti armas ken equipment dagitoy kas iti kaaddan fighter jets.
Innayonna a mabalin nga uray dagiti ground commanders ti mangdesisyon no maaramat dagiti moderno nga armas kontra kadagiti kalaban, saan a kas idi a kasapulan pay ti pammalubos ti presidente.
Impettengna pay a dakkel a tulong ti panakaideklara ti Martial Law sadiay Mindanao tapnu madisiplina dagiti tattao ken maipatungpal a naimbag dagiti pagalagadan kas iti curfew a no mamingsan ket tagtagibassiten dagiti tattao.
Kabayatanna, impasigurado ni Col. Asto nga adda met ti panagsanay dagiti reservist para iti amin a sitwasyon nangruna no adda ti aggression wenno internal threat iti pagilian.
Nupay kasta, inaklonna a nakaipamaysa ita ti panagsanay dagiti reservist iti disaster and relief management, rescue operations ken dadduma pay a para iti humanitarian assistance.
