Makita iti video ti panagunget, panagriaw ken panangkarit ti driver ti puraw a government vehicle iti driver ti nakasabatna a truck idiay Gonogon, Bontoc, Mt Province.
Makita pay iti video nga imbes a ti driver ti government vehicle ti agpabigay ket daytoy pay ti nakapungtot ken kinaritna iti boksing ti driver ti truck.
Nakadkadlaw pay nga adda iti impluwensia ti arak ti driver ti government vehicle.
Iti interview ni Bombo Alfred Pudsoc iti driver ti 10 wheeler truck, kinunana a napasamak ti insidente pasado 7 pm idi Enero 25.
Sigun kenkuana, kargado ti luganna iti bagas ken rice mill rason a marigatan nga agatras.
Sigun pay kenkuana, pinangtaan daytoy ti driver ti government vehicle a paltoganna daytoy ngem saanna laeng a naalaan iti video.
Mapapati a ti driver ti government vehicle ket empleyado ti Mt. Province provincial government.
Ikagkagumaan met ti Bombo Radyo nga alaen ti dasig dagiti maseknan nga empleyado ti Mt Province mainaig iti daytoy nga insidente.
