BAGUIO CITY – Imballaag ti dadaulo ti maysa a kooperatiba dagiti mannalon iti Baguio-Benguet ti panagraira manen dagiti ‘fly-by-night’ a buyers a mangbikbiktima kadagiti mannalon ken disposers iti vegetable trading industry ditoy lokalidad.
Iti panakipatang ti Bombo Radyo kenni Agot Balanoy, kinunana a kagiddan ti panagadu dagiti good buyers ita a bulan ket umado met dagiti ‘fly-by-night’ buyers
Impalawagna a naawagan dagitoy a ‘fly-by-night’ buyers gaputa awan ti balakda a mangbayad iti nateng nga angkatenda manipud kadagiti disposers ken utangenda ti bayad ti angkatenda ita a bulan ngem inton sumaruno a bulan ti Enero ket saanen a makita dagitoy iti trading post ken agparangda manen iti Disyembre ti sumaruno a tawen.
Dinakamatna a tinawen nga adu dagiti maitartarayan a mannalon ken disposers gapu iti panamatida kadagiti nasoa a ‘fly-by-night’ buyers.
Sigun kenkuana, kadawyan a dagiti ‘fly-by-night’ buyers ti nakarit iti presyo wenno dagitoy dagiti ag-bid iti nangato a presyo ken agipauna laeng iti bayadda a P1,000 ken nangatngato iti P2 agingga P5 ti bid dagitoy no idilig kadagiti good buyers.
Gapu iti daytoy, impetteng ni Balanoy a nasken nga agtinnulong ti mannalon ken ti disposers babaen iti panangipetteng met ti disposer iti sistema a “bayad muna bago hakot”.
Imbalakadna pay a no ipautang ti mannalon ken disposer dagiti nateng ket pilyenda dagiti am-ammoda a buyer ken saanda a mamatpati kadagiti baro a rupa.
Naamuan nga adda pay dagiti ‘fly-by-night’ buyers nga agbaybayad iti cheke ngem saan nga agbalin wenno awan ti linaon daytoy.
