BAGUIO CITY – Agtultuloy ti panagrehistro dagiti umili iti rehiyon Cordillera babaen iti register anywhere program ti Commission on Elections.
Daytoy ket kagiddan ti umadanin a panagleppas ti voters registration a naituding inton Setiembre 30 para iti 2025 local ken national elections.
Iti interview ti Bombo Radyo kenni Atty. Julius Torres, Regional Director ti Commission on Elections – Cordillera, nasayaat ti partisipasion dagiti indibidual ken adu ti agpaparehistro a maak-akomodarda iti agdama.
Maibasar iti datos, dumanonen iti agarup 1,053,000 a botante ti nakarehistro, ken posible pay a manayonan ti nasao a bilang.
Nupay kasta, maibilang ladta ti rehiyon Cordillera kadagiti lugar iti pagilian a Pilipinas a kababaan ti bilang ti nakarehistro a botante.
Idi nadamag ni Torres nu adda pay dagiti wagas a mabalin a mapangato ti nasao a bilang, kinunana nga ipatpatungpalda ti satellite registration iti nagduduma a lugar iti rehiyon
Ti satellite registration ket wagas ti nasao nga ahensia a maiyasideg iti programa nangruna iti nasulinek a lugar tapno ad-adda a nalaklaka ti panagparehistro iti tunggal indibidual.
Kabayatanna, awan ti nairekord ti nasao nga ahensia nga aniaman a krimen nga adda pakainaiganna iti umadanin a midterm elections.
Iti agdama, nakapokus ti Commission on Elections – Cordillera iti panag-akomodar kadagiti indibidual a kayatna nga agparehistro.
