BAGUIO CITY – Pagan-annaden ti DPWH-Baguio City District Engineering Office dagiti umili nga agnanaed ken dumaldalyasat iti masakupan ti Kennon Road.
Sigun kenni Assistant District Engineer Glenn Reyes, nailistan ti sumagmamano nga insidente ti panagreggaay iti nagduduma a paset ti Kennon Road.
Kinunana a limmukneng ti daga gapu iti agtultuloy a panagbayakabak ti napigsa a tudo nga ituntunda ti nepnep.
Innayonna nga adda metlaeng dagiti nadadael a rock netting iti deppaar ti Kennon Road kalpasan a limmukneng ti nakaimuntaran dagitoy a batbato.
Sigun kenkuana, iti agdama ket 21 a critical points iti Kennon Road ti nainget a bambantayan dagitoy ken kanayon a maipaspasidong iti inspeksion tapnu maipanamnama ti kinatalged dagiti umili nga agnanaed iti asideg dagitoy.
Maipalagip nga agingga ita ket agtaltalinaed a nakarikep ti Kennon Road kadagiti motorista a sumrek iti Baguio City malkasid laeng kadagiti residente sadiay.
Maibasar pay iti rekord ti DPWH-Cordillera, dumanonen iti P113-M ti inisyal a danyos iti sektor ti imprastraktura gapu iti agdama a nepnep ken kaaduan kadagitoy ket nailista iti Benguet, Abra ken Mountain Province.
