BAGUIO CITY – Iyap-apela dagiti taxi drivers ken operators iti Baguio ti panangdoble ti pulisya iti panangwanawan dagitoy kadagiti aktibidad iti siudad a mabalin a mangitunda iti panagaramid dagiti tattao iti iligal kas iti panaghold-up.
Kasaruno daytoy ti napasamak a panang-hold-up ti dua a lalaki ken maysa a babai iti maysa a taxi driver ditoy siudad, no sadino, binagbagsolda ti biktima ken tinakawda pay ti koleksion daytoy.
Iti panakiuman ti Bombo Radyo Baguio kenni Oliver Manzano, dadaulo ti maysa a taxi group ditoy siudad, imbinglayna a makapa-alarma ti insidente gaputa nasuroken a makatawen nga awan ti kapada nga insidente a napaspasamak iti lokalidad.
Kinunana nga ita a pandemya ket bassiten dagiti pasahero iti rabii ken nagtalek dagiti pulis ken dagiti driver ken operator a dagiti laeng APOR ti rumrumwar iti rabii.
Nupay kasta, dinakamatna nga iti obserbasyonda ket adda ti operasyon dagiti iligal a gambling den iti lokalidad a kas iti impablaak ti kadwada a nakailugan iti nakainom ken naabak iti sugalan nga awanan ti pagbayad isut gapuna a nagbayad ti foreign currency.
Sigun kenkuana, daytoy ti maysa a makitkitada a rason no apay nga iti rabii ket adda dagiti agraraira a panag-hold-up.
Gapu iti daytoy, dinakamat ni Manzano a kaaduan kadagiti taxi drivers iti lokalidad ti addaan ti two-way radio a numero uno nga armas dagitoy iti rabii tapnu impormaranda dagiti kakadwada iti lokasyonda.
Innayonna a gapu iti insidente idi parbangon kalman ket adun dagiti taxi drivers nga agpili ti iluganda gapu iti amak dagitoy a maituladda iti biktima.
Sigun kenkuana, adda met idi dagiti programa ti pulisya para iti panakasalaknib dagiti taxi drivers manipud iti insidente ti hold-up ngem gapu iti panagsukat ti liderato ti pulisya ket masuksukatan dagiti kangrunaan a programa ti organisasyon.
Kabayatanna, ibalbalakad pay ni Manzano ti panagridam ken kanayon a panag-alerto dagiti taxi drivers kabayatan ti panagbiahe dagitoy iti rabii.
Sigun kenkuana, nasken a dobliyen dagiti taxi drivers ti panagannadda ken ti panangipasiguradoda nga addaanda iti umdas nga inana tapnu agtalinaed ti kina-alertoda bayat ti panagbiaheda.
Kinunana a nasken met a dagus nga iturong dagiti taxi drivers kadagiti istasyon ti pulisya no mapagduadua-an dagiti pasaheroda.
Dinakamatna a ti nagbalin a modus ti nagsasaruno a panaghold-up ti taxi iti rabii, nasurok lima a tawenen ti napalabas ket ti panag-aramat dagiti hold-uppers kadagiti babbai kas appan.
Kagiddan iti daytoy, inyapela ni Manzano ti agtultuloy a panangtulong ti komunidad kadagiti taxi drivers nga agkasapulan ti tulong kas kadagiti mabiktima dagiti managdakdakes.
Imbinglayna a sibilyan wenno umili ti rason no apay a narisut dagiti nagsasaruno a kaso ti panaghold-up kadagiti taxi drivers iti siudad idi kalpasan nga inreport ti nasao nga indibidual iti pulisya ken barangay officials ti presensia ti mapagduadua-an a grupo.
Naduktalan kalpasan a natiliw ti grupo a dagitoy ti mangbikbiktima kadagiti taxi drivers.
