Impalagip ti Philippine National Police (PNP) ti panagridam ti publiko kadagiti “akyat bahay” wenno dagiti mannanakaw a mabalin a manggundaway iti kaawan dagitoy bayat ti bakasionda.
Sigun iti pannakangiwat ti Philippine National Police a ni Police Brigadier General Jean Fajardo, maysa kadagiti mailislista nga insidente ita a panawen ti bakasion ket ti akyat bahay ken dagiti mangdadael ti ridaw ken tawa.
Gapu iti dayta, imbilinna a rumbeng a “secured” ken natalged a mapanawan dagiti babbalay ken paglakuan wenno kantina.
Kinunana a maideploy dagiti kameng ti pulisia kadagiti barangay tapno masigurado a natalged dagiti balay ken establisimiento.
Manipud idi kalman, kinuna ni Fajardo nga agarup 37,000 a pulis ti naideploy iti intero a pagilian tapno masiguro ti pannakarambak ti holiday season.
Kabayatanna, impalagip ni Fajardo kadagiti motorista a kitaenda ti kasasaad dagiti luganda ken siguraduenda nga umdas ti turogda ken saanda a nabartek tapno maliklikan ti aksidente kadagiti kalsada.
Para iti pannakangiwat ti Philippine National Police, saanen pay nga ipablaak iti social media ti update iti ayanda tapno maliklikan ti panangipaay ti impormasion kadagiti kriminal.
