Kweskwestiunaran ti House Quad Committee iti Bureau of Immigration ken iti Department of Foreign Affairs no kasatno a nakaruar iti Pilipinas ni sigud a Presidential Spokesperson Harry Roque.
Daytoy ket iti baet a sumangsango iti contempt ken detention order manipud iti committee idi setyembre, idi napalabas a tawen gapu iti saanna a panangikankano iti kiddawda a panagparangna seknan iti kaso ti Philippine Offshore Gaming Operators (POGO).
Sigun kenni Lead Co-Chairperson Rep. Robert Ace Barbers, agtaltalinaed nga epektibo ti nasao nga order, ngem saan a mabalin a maarestar ni Roque sadiay The Netherlands iti bisa ti contempt ken detention order ti committee.
Gapu iti dayta, mapaayaban dagiti maseknan nga otoridad iti Bureau of Immigration ken iti Department of Foreign Affairs iti sumaruno a hearing dagitoy inton biernes tapno ilawlawag ti nasao a banag.
