BAGUIO CITY – Palpalagipan manen ti ama ti Benguet dagiti umili kasaruno ti panakaideklara ti rainy season wenno panagtutudo iti pagilian.
Iti interview ti Bombo Radyo Baguio, kinuna ni Governor Melchor Diclas a nasken a kanayon nga agannad ken ag-alerto dagiti umili nga agnanaed kadagiti disso a narisgo iti panagreggaay ti daga ken panaglayos.
Kinunana a kasapulan a dagus nga agbakwit no kasapulan nangruna no napeggaden ti pagnanaedan dagitoy.
Innayonna a nasken a kanayon nga agdengngeg iti radyo tapnu kanayon a maimpormaran iti sasaaden ti panawen.
Dinakamatna metlaeng a kasaritada ti DPWH para iti panakaisagana dagiti kagawaan nga agwaknit kadagiti kalsada a pakapasamakan ti panagreggaay ti daga tapnu saan a mataktak ti panagbiahe dagiti mannalon ken dagiti motorista.
Sigun pay kenni Gov. Diclas, sumaysayaat metten ti lebel ti danum iti Ambuklao Dam ken Binga Dam kalpasan a nailista ti panagbaba ti lebel ti danum dagitoy kadagiti napalabas a bulan.
