Impakaamo ti United States (US) State Department a nabayagen, “purely defensive,” ken nairanta a mangparegta ti panagsagana ti puersa ken mangpreserba ti seguridad iti rehion ti maisaysayangkat nga US-Philippine military exercises.
Daytoy ket sungbat ti pannakangiwat iti kiddaw a komento kalpasan nga indagadag ti defense ministry ti China iti Pilipinas nga ibaw-ingna dagiti US Typhon intermediate-range missiles.
Dagiti Typhon launcher, a paset ti panagregget ti US a mangurnong iti arsenal dagiti armas a panglaban iti barko idiay Asia, ket makapaltog iti multipurpose missiles iti kaaddayo nga agingga iti rinibu a kilometro.
Sigun iti pannakangiwat, ti temporario a pannakaideploy ti US missile iti Pilipinas ket sungbat iti nagadu a pangta,ken nairanta a mangmintinir ti kinasagana ti Pilipinas ken Estados Unidos.
Impadamag pay ti pannakangiwat a nangideploy ti Beijing ti ballistic medium ken intermediate-range missiles a mangsaklaw iti agingga 3,000 km wenno 5,000 km karaman ti para iti nuclear.
Inakusaran ti defense ministry ti China ti Pilipinas a naglabsing kadagiti kari babaen ti panangipaulogda iti missile system, nga inawagannat’ “strategic offensive weapon”.
Nupay kasta, kinuna ti Pilipinas a nairanta laeng ti Typhon missile system para iti depensa ken saan a pulos nga inkari ti Southeast Asian nation nga ibaw-ingna daytoy.
