BAGUIO CITY – Agtultuloy ti search and rescue operation tapnu mabirukan ti bagi ti maysa a mannalon a mapapati a naiyanod kabayatan ti panagballasiwna iti Tineg River iti deppaar ti Quidaoen, San Juan, Abra idi kanikadua, July 29.
Nabigbig daytoy a ni Joseph Luis Tadeo Barbosa, 57-anyos, mannalon ken residente ti Quidaoen, San Juan, Abra.
Sigun kenni Arnel Valdez, Provincial DRRM Officer ti Abra, mapapati a kabayatan ti panagballasiw ni Barbosa iti Tineg River ket naiyanod daytoy iti napegges nga ayos ti danum.
Kinunana nga apan kuma kitaen ni Barbosa dagiti taraken daytoy a baka idi napasamak ti insidente iti agarup alas-dies trenta ti agsapa idi kalma.
Innayonna nga iti agadama ket sawsawaren dagiti search and rescue operation teams dagiti munisipyo a dumalanan ti nasao a karayan.
