Pagdandanagan dagiti Dumagats ti agtultuloy panagbaba ti libel ti danum iti Angat Dam sadiay Barangay San Lorenzo, Norzagaray, Bulacan.
Sigun iti panglakayen ti Dumagat a ni Mario Villarama, nakaru ti panagbaba ti libel danum gaputa awan ti tudo iti lugar dagitoy.
Daytoy ket iti baet a makapaspasar ti sumagmamano a paset ti pagilian iti tudo.
Innayon dagiti residente nga adda ti gundaway nga agtudo, ngem mapalabas ti tallo nga aldaw sakbay manen nga agbayakabak ti tudo.
Sigun pay kenni Villarama, simmardeng ti pagbiagan dagitoy gapu iti kinakurang ti danum iti nasao a dam a mangituntunda iti panagbaba ti produksyon ti ikan.
Gapu iti dayta, agkidkiddaw dagiti Dumagats iti tulong gapu iti epekto ti panagbaba ti libel ti danum iti Angat Dam a kangrunaan a pagtataudan ti pagbiagan dagitoy.
