BAGUIO CITY – Pinagyamanan ni Benguet Governor Melchor Diclas ti panagsarungkar ni PNP Chief, Police General Guillermo Eleazar iti probinsia.
Imbinglayna iti panakiuman ti Bombo Radyo Baguio nga iti panag-courtesy call ti PNP Chief kadagiti opisyal ti probinsia ket napagsaritaanda ti agdama a sitwasyon ti Benguet kagiddan ti pananglaban ti probinsia iti agdama a pandemya gapu iti COVID-19 iti sidong ti modified GCQ status.
Kinunana nga indanun kenkuana ti PNP Chief dagiti programa ti pulisya, partikular ti nainget nga implementasyon ti panagdalus kadagiti arubayan ken uneg dagiti istasyon ti PNP ken ti panagdalus iti mismo a rangko ti organisasyon.
Innayonna nga adda metlaeng ti modernisasyon iti PNP, partikular kadagiti pasdek dagiti municipal stations, city stations, sub-station ken dagiti patrol vehicles.
Dinakamatna pay nga adda ti saritaan ti kongresista ti Benguet ken ni Gen. Eleazar mainaig iti panakaiwaras ti saggaysa a patrol car iti tunggal munisipyo ti probinsia.
Napagsaritaan metlaeng dagitoy ti iligal a droga ken ti napasamak iti daydi Colonel Michael Bawayan Jr. a sigud a dadaulo ti Sulu Police a rason iti panakapasayaat ita ti panag-recruit kadagiti sumrek a pulis.
