BAGUIO CITY – Agtultuloy ti panagsawar dagiti tropa ti gobyerno iti kabambantayan a nakapasamakan ti engkwentro iti nagbaetan ti 24th Infantry Battalion, Philippine Army ken dagiti kameng ti rebelde a New People’s Army sadiay Lan-ag, Lacub, Abra idi Lunes, February 17.
Maibasar iti report, nagresponde dagiti soldado iti report manipud kadagiti maseknan a residente ti Barangay Lan-ag seknan iti regular a panagsarungkar dagiti armado a lallaki iti barangayda tapnu agawis iti makikappeng kadagitoy ken agkikil kadagiti umili.
Dagus met a nangisayangkat dagiti soldado iti panagpatrolya iti kabambantayan a paset ti barangay tapnu iberipikar ti naawatda a report.
Nupay kasta, apaman a nakasangpet dagiti soldado iti bisinidad ti barangay ket pinalpaltogan dagiti agarup nasurok 15 a rebelde dagitoy.
Nagbales dagiti soldado a nagresulta iti agarup 15 a minuto a rinnupak agingga a nagsanod dagiti rebelde ken naglibas dagitoy iti nagduduma a direksion.
Sigun iti militar, awan ti nadangran wenno pimmusay iti tropa ti gobyerno ken narekoberda iti nagpwestuan dagiti rebelde ti 10 a basyo ti bala ti 5.56mm M16 rifle.
Naduktalan a dagiti nakaranget dagiti soldado ket dagiti rebelde a kameng ti Komiteng Larangang Gerilya – North Abra.
