BAGUIO CITY – Balballaagan manen ti Land Transportation Franchising and Regulatory Board (LTFRB) dagiti drivers ken operators dagiti parapubliko a lugan iti siudad ti Baguio, nangruna iti ruta ti Irisan iti panagtulnogda iti responsibilidadda a panagserbisyo iti riding public iti masakupan dagitoy ken ti pagalagadan iti panagsingir iti umno a plete.
Kasaruno daytoy ti naobserbaran nga atiddog a pila idi kalman sadiay Irisan Barangay.
Iti interview ti Bombo Radyo Baguio kenni Atty. Laird Dionel Urbanozo, Chief Transport Development Officer ti LTFRB-Cordillera, inlawlawagna a dagiti drivers ken operators dagiti parapasahero a jeep nga agkedked nga agbiahe ket mabalin a maireklamo iti “refusal to render service to the public or convey passenger to destination”.
Kinunana a nailanad iti Joint Administrative Order No. 2014-01 ti DOTr, LTFRB ken LTO a no mapaneknekan ti nasao a panaglabsing ket mamulta ti maseknan a driver wenno operator iti P5,000 iti first offense bayat a mula a P10,000 ken makabulan a panaka-impound ti lugan iti second offense ken multa a P15,000 ken panakakanselar ti prangkisa ti lugan iti third offense ken sumarsaruno pay a panaglabsing.
Dinakamat pay ni Atty. Urbanozo a kapada a multa ken pannusa ti maipataw kadagiti drivers ken operators a mabigbig wenno mapaneknekan a nag-overcharge wenno nagsingir iti plete a nasursurok no iti intuding ti linteg.
Inyunay-unayna nga iti agdama ket awan ti napalubusan a panangipangato iti plete ken agtaltalinaed a P9 ti plete iti short trip iti pagilian.
Imbinglayna nga addan ti maysa a driver iti ruta ti Irisan a minultada gapu iti overcharging.
Sigun kenkuana, namin adun a binalballaaganda dagiti kooperatiba dagiti parapasahero a jeep iti lokalidad a naireklreklamo iti opisinada gapu iti overcharging.
Impalagip pay ni Atty. Urbanozo nga adda met ti ordinansa ti Baguio a nangipalubos iti panakaimuntar dagiti gift box kadagiti parapasahero a jeep a mabalin a pangitennagan dagiti pasahero iti tulongda kadagiti drivers.
Maibasar met iti social media page ti risan Jeepney Operators and Drivers Association, linawlawaganda nga awan ti napasamak nga strike idi kalman ken nagbiahe latta dagiti naka-schedule nga agbiahe.
Nupay kasta, kiniddawda ti panaganus dagiti umili nga aguray gaputa aggapu pay iti loading area dagiti mangkarga kadagitoy.
Inlawlawagda a saanda a kabaelan nga ag-express gaputa dakkel ti agbalin a gastos dagitoy, partikular iti krudo ti lugan ken ag-abonoda pay nangruna dagiti agbayad ti boundary.
