Inlawlawag ni Interior Secreary Jonvic Remulla a posible a dumanon iti maysa agingga tallo a lawas sakbay a maisubli iti Pilipinas ni sigud nga Ako-Bicol Partylist Representative Elizaldy “Zaldy” Co manipud Czech Republic.
Naarestar ti Co idiay Prague gapu ta naduktalan nga awan ti umdas a travel document na kabayatan a pinaggepna nga agturong Germany.
Sigun iti report, pinasublida daytoy kadagiti otoridad ti Czech ken mannarimaan a maisimsimpa ti proseso iti deportation daytoy.
Sigun met kenni Interior Secretary Remulla, nakadepende ti kapartak ti panangpaawid iti sigud a mammanday-linteg iti koordinasyon ti Department of Foreign Affairs ken ti otoridad idiay Czech Republic.
Adda met laeng ti komplikasyon gapu ta nakansekar ti Philippine passport daytoy.
Sumangsango ti Co iti kaso a graft ken malversation seknan P289.5 milyon a flood control project idiay Oriental Mindoro.
Mabigbigbig metlaeng ita ni Co kas “fugitive from justice” ti Sandiganbayan kalpasan a nagkedked daytoy nga agawid iti Pilipinas tapno sangwenna dagiti kaso daytoy.
Apaman a mapaawida ni Co, dumalan daytoy iti Sandiganbayan para iti arraignment ken posible a maibalod iti Camp Crame kabayatan iti panagdengngeg ti kaso daytoy.
Kabayatanna, kinuna ti Malacanang a nakasagana ni Presdident Ferdinand “Bongbong” Marcos, Jr. iti anyaman nga statement ni Co ken impetteng daytoy a kasaulan a makemmegen dagiti adda pakainaiganna iti flood control scandal. //bombokaren.c.s
