Maipalpalagip manen kadagiti residente ti La Trinidad, Benguet ti panagsurot dagitoy iti Garbage Collection Schedule wenno ti skediul ti panagbasura.
Naikarga metten dagiti tarpaulin kadagiti garbage collection sites a mangipalpalagip a ti koleksyon ti basura ket manipud iti oras ti alas singko ti agsapa agingga alas syete ti agsapa.
Gapu iti dayta, nasken nga awan ti agbasura nu saan nga oras ti panagbabasura nangruna nu rabii.
Malaksid iti dayta, makidkiddaw ti panagsegregate dagiti residente kadagiti basurada tapno nalaklaka daytoy nga iaramid dagiti Bantay basura advocates.
Nasken a dagiti “nabubulok” ket maisina kadagiti “di-nabubulok” kasta met a maisina met laeng dagiti plastic bottles, lata wenno dagiti banag a mabalin a marecycle.
Iti sabali a bangir, rumbeng a masurot ti Republic Act 9003 wenno ti “Ecological Solid Waste Management Act of 2000” kasta met ti La Trinidad Solid Waste Management tapno agbalin a nalaklaka ti panakaimanehar dagiti basura.
