BAGUIO CITY – Impanakkel ti dadaulo ti Bureau of Jail Management and Penology-Cordillera ti panagtalinaed a COVID19-free dagiti amin a balud iti rehion.
Iti panakiyuman ti Bombo Radyo Baguio kenni Jail Senior Superintendent Ronald Lee Cael, kinunana a resulta daytoy ti naannayas a wagas ti panagrespondeda iti COVID19 tapno masalwadan dagiti balud kontra iti virus.
Imbinglayna a nailistada ti dua laeng a kaso ti virus kadagiti personnel ti BJMP-Cordillera ngem dagitoyen ket naimbagan manipud iti sakit.
Kinunana pay a 77 a porsiento a katukad iti 396 a personnel dagitoy ti naan-anayen a nabakunaan kontra iti COVID19 bayat a 9.3 percent a katukad ti 48 a personnel ti nakaawat iti first dose ken 14 percent a katukad met iti 72 dagiti saan pay a nabakunaan.
Innayona nga iti pakabuklan a 1,181 a bilang dagiti balud iti BJMP-Cordillera, 47 percent a katukad iti 553 dagiti nakakompleto iti bakunada, 3.9 percent a katukad ti 154 dagiti nabakunaan iti umuna a dose bayat nga 400 dagiti saan pay a nabakunaan a buklen ti 14 a porsiento manipud iti populasion.
Karaman kadagiti naipaay a bakuna kadagitoy ti Sinovac, Johnson and Johnson, Sputnik V, Sinopharm ken Pfizer.
Sigun pay kenni Jail SSpt. Cael, naipaayan dagiti balud iti anti-flu vaccine tapno tumulong a mangpapaigsa iti salun-at dagitoy iti kanito a maadaan iti outbreak ti virus iti pagbaludan.
Kabayatana, nakompleton ti konstruksion dagiti sumagmamano a pagbaludan iti intero a rehion.
Kinunana a mangrugin nga agoperate ti Tabuk Districct Jail a masarakan sadiay Kalinga, ti Luna District Jail sadiay Apayao ken ti La Trinidad Municipal Jail.
Kinunana a ti laeng covered gym ti Baguio City Jail Dorm ti manarimaan a maipatpatakder iti agdama.
Nanayonan met iti sangapulo a unit ti ti van nga ar-aramaten ti BJMP-CAR a mangibiyahe kadagiti balod a maituturong sadiay.
Imbinglay ti opisyal a ti panakanayon dagiti pagbaludan iti rehion ket addang ti opisinada tapno maliklikan ti panagsisineksek dagiti balud iti selda kas pananaggannadda iti pangta ti COVID19 virus.
Malaksid iti daytoy, puntiryada a maipaayan iti komportable a pagyanan dagiti balud iti maiturturong sadiay.
