Impeksa ti Department of Health (DOH) nga adda pay dadduma a wagas a mangtaming iti panagsikog dagiti agtutubo iti tengnga ti kontrobersial a damag maipapan iti Senate Bill 1979, wenno ti Adolescent Pregnancy Prevention Bill.
Kasaruno ti panangulit ti Department of Health (DOH) a saanen a kasapulan ti baro a linteg a mangtaming iti nasao nga isyu ken kasapulan laeng ti umno a pannakaipatungpal ti Responsible Parenthood and Reproductive Health Law of 2012 (RH Law).
Sigun kenni DOH Assistant Secretary Dr. Albert Domingo, maysa nga addang tapno maipatungpal a nasayaat ti linteg ket ti panangala kadagiti health professionals wenno eksperto a mangisuro kadagiti estudiante.
Innayonna pay a kasapulan a mangala ti sumagmamano a nurses kadagiti pagadalan tapno agbalin a solusion daytoy.
Kabayatanna, ni Senate Deputy Minority Leader Risa Hontiveros ket nangipaulog ti substitute bill iti Senate Bill 1979 nga addaan iti pannakabalbaliw a mangtaming kadagiti pakaseknan maipapan iti Comprehensive Sexual Education (CSE).
Inyebkas ti chairman ti Senate Women, Children, Family Relations, and Gender Equality Committee a ni Senador Hontiveros ti panagtalekna a ti nabaliwan a gakat ket mangrisut iti pakaseknan ni Presidente Ferdinand “Bongbong” Marcos Jr. iti napalabas a bersion.
Impasigurado met ti Department of Health a tulunganda ti Kongreso a mangaramid ti addang tapno maisuro ti comprehensive sexuality education (CSE) kadagiti pagadalan nga epektibo.
