Pagdandanagan ita dagiti residente nangruna dagiti asideg iti rockshed sadiay Kennon Road ti posible a panagtennag ti dakkel a bato nga adda iti tuktok ti bantay.
Daytoy a pakaseknan ket naipablaak metlaeng iti social media gapu pay laeng iti agtultuloy a mapaspasaran a panagtudo.
Sigun iti eksklusibo a pannakiuman ti Bombo Newsteam kenni Barangay Kagawad Juanito Valle iti Committee on Infrastructure, Land Environment and Natural Resources ti Barangay Camp 4, Tuba, Benguet, iti panag-inspectda sadiay talaga a nakabitin laengen ti nasao a dakel a bato.
Impeksa ni Valle a manipud idi naaramid ti rockshed ken nagaraw ti nasao a bantay, pasaray agtinnagen dagiti batbato.
Kinuna pay ti nasao a barangay official, nupay adda metlaeng dagiti matmatnag a bato sakbay iti pannakaipasdek ti rockshed, adadda a kimmaro ita gapu iti pannakagaraw ti bantay.
Mainaig iti dayta, araramiden met amin dagitoy ti kabaelanda kas iti panangbalakad kadagiti residente sadiay a nu saan a nasayaat ti kasasaad ti panawen ken mariknada a delikado ti sitwasyon, nasaysayaat a pumanawda paylaeng sadiay kasta metten nga iyakarda dagiti lugan a maiparparada sadiay.
Innayon pay ti opisyal a posible a manayonan iti 35 meter ti nasao a rockshed, banag a makitkita a makatulong tapno matengngel wenno masarapana dagiti batbato nga agtintinnag sadiay.
Inlanad pay ni Valle nga inbilin ti mayor ti nasao a munisipyo kaduada nga agalertoda nangruna ita a saan a nasayaat a panawen. // via Bombo Noveh Organo
