BAGUIO CITY – Mairtengan pay ti relasyon dagiti pulis iti rehiyon Cordillera ken dagiti agtutubo tapno mailiklik dagitoy manipud iti panakikappengda iti makakannigid a grupo.
Sigun kenni PCol. Mali Cula, dadaulo ti Regional Community Affairs and Development Division ti Police Regional Office Cordillera, babaen daytoy iti panakabukel ken panakapatibker ti Kabataan Kontra Droga at Terorismo (KKDAT) kadagiti nagduduma a lugar iti rehion tapnu masalwadan dagiti agtutubo manipud kadagiti iligal nga aktibidad.
Kinunana a nasken a maipaayan iti pateg dagiti agtutubo gaputa dakkel ti maar-aramidan dagitoy iti komunidad ken iti pulisya.
Dinakamatna a malaksid iti panakibinnadangda kadagiti agtutubo ket ipaspasidong dagiti pulis iti panagsanay dagiti agtutubo mainaig iti leadership, skills ken dadduma pay a mabalin a maiyaplikar iti biag ken iti komunidad dagitoy.
Maibasar iti datus, nasuroken iti 2,600 ti miembro ti KKDAT iti rehion ken agtultuloy a maipatpatungpal dagiti nagduduma a programa dagitoy kas iti youth development session, sining bayanihan ken dadduma pay tapnu maallukoy pay dagiti dadduma nga agtutubo.
