BAGUIO CITY – Ipabiangen ti Pamilya Dormitorio ken ti legal council dagitoy kadagiti prosecutors ti panagtulid dagiti nagtutuon a kaso a naipila kontra kadagiti pito a kadete, dua a tactical officers ken tallo a medical doctors ti Philippine Military Academy gapu iti ipupusay daydi Cadet 4th Class Darwin Dormitorio.
Sigun kenni Atty. Jose Adrian Bonifacio, legal counsel ti Pamilya Dormitorio, napaka-ammuanda nga adda ti buklen ti City Prosecutor’s Office ti Baguio a maysa a pannel dagiti prosecutors a mangimbestigar ken mangtingiting kadagiti kaso.
Kinunana a maipaayan met iti gundaway dagiti respondents wenno naireklamo nga agpalawag no maawat dagitoy ti reklamo a naipila kontra kadakuada.
Innayonna a maituding met ti panagdengngeg para iti preliminary investigation kadagiti nasao a kaso.
Nupay kasta, dinakamat ni Atty. Bonifacio a tarigagay ti Pamilya Dormitorio ti napartak a panakatingiting ti kaso.
Maipalagip a naipilan ti kaso a panaglabsing iti Anti-Hazing Act of 2018 ken Anti-Torture Act of 2009 ken murder kontra kadagiti pito a kadete nga idadauluan ni Cadet 1st Class Axl Rey Sanopao gapu iti panangmaltratoda kenni Cadet Dormitorio.
Nakasuan met dagiti tactical officers a da Major Rex Bolo ken Captain Jeffrey Batistiana gapu iti panagbalinda nga ‘accomplices’ iti panaglabsing iti Anti-Hazing Law of 2018 ken iti panagbalinda a ‘principals’ iti panaglabsing iti Anti-Torture Act of 2009 malaksid pay iti dereliction of duty.
Sumango pay iti kaso a dereliction of duty dagiti tallo a medical physicians ti akademya a da Captain Flor Apple Apostol, Major Maria Ofelia Beloy ken Lt. Col. Cesar Candelaria.
