BAGUIO CITY – Kidkiddawen ti City Health Services Office ti panagtungpal dagiti pagtagilakuan nga asideg kadagiti pagadalan iti Smoke-Free Baguio Ordinance.
Partikular a dakdakamaten ni ti City Health Officer Dr. Rowena Galpo dagiti probisyon ti ordinansa a maipawil ti panagilako iti sigarilyo kadagiti menor de edad ken ti pagilako iti sigarilyo kadagiti asideg dagiti pagadalan.
Naamuan a maipawil ti panangilako iti sigarilyo dagiti pagtagilakuan nga adda iti uneg ti 100 meters nga aglawlaw dagiti pagadalan kadagiti estudyante.
Sigun kenkuana, katulonganda a mangbantay kadagiti nasao a pagtagilakuan dagiti na-deputized nga enforcer ti nasao nga ordinansa ti siudad.
Dinakamat pay ni Dr. Galpo a manipud nag-epektibo ti ordinansa idi napalabas a tawen ket adun dagiti nakemmegda nga agilaklako iti sigarilyo iti igid dagiti pagadalan.
Linawlawaganna met a saanda nga ipawpawil ti panagilako iti sigarilyo ngem ketdi, maipawil ti panangilako kadagitoy kadagiti menor de edad ken kadagiti opisina ti gobyerno.
