Pimmusay ti lima a miembro iti maysa a pamilya idiay Barangay Cawayanin, Pitogo, Quezon Province kalpasan a natupakan iti natuled a kayo iti buli ti kalapaw a pagnanaedanda.
Napasamak daytoy pasado alas sinco iti agsapa idi kalman kabayatan ti panagdalapos ni bagyo a Ramil.
Binigbig iti Pitogo Municipal Police Station dagiti biktima a da Alvin Peña nga agtawen iti 35; ti asawana a ni Jean Andrea Peña nga agtawen metlaeng iti 35; dagiti dua nga annakda nga agtawen iti 2 ken 11; ken ti apong dagitoy a ni Alberto Bueno nga agtawen met 67.
Ti laeng nakalasat iti nasao nga insidente ket ti innauna nga anak dagiti pimmusay nga agassawa nga agtawen laeng iti 17.
Sigun iti salaysay ti maysa kadagiti kabagyanda, matmaturog dagiti pimmusay idi napasamak ti insidente nu sadino, nagsagrap dagitoy iti nakaro a dunor rason a dandani saanen mabigbig ti langa ti narekober a bagida.
Imbinglay daytoy nga immunan a pinadasna ken ti pimmusay a padre de pamilia nga uramen ti base ti nasao a kayo iti namnama a matay daytoy ken saan a matuled iti disso a nagtakderan iti nasao a pagtaengan.
Rumrumwar a ti partial a panakauram ti base ti nasao a kayo ti nangitunda iti panagkapoy ti takderna ken ti panakatuledna.
Kabayatanna, nangipaay metten ti maseknan a lokal a gobyerno iti inisyal a tulong para iti panakaimansayag dagiti biktima.
