BAGUIO CITY – Panawenen tapnu maamyendaran dagiti dadduma a probisyon iti Labor Code ti Pilipinas.
Iti panakiyuman ti Bombo Radyo kenni Atty. Jingboy Atonen, maysa a legal luminary ditoy lokalidad, kinunana nga outdated wenno daan unayen t sumagmamano kadagiti probisyon ti Labor Code ti pagilian tapnu mabalanse ti sitwasyon iti panagtegged.
Kinunana a panawenen tapnu magibusan ti aramid dagiti employers a panangliklik iti probisyon ti linteg a mangikalkalikagum a kalpasan ti innem a bulan ket nasken a maipermanente ti maysa nga empleyado.
Mangnamnama met daytoy a ti Executive Order (EO) ni Presidente Duterte a mangipawpawil iti contracting ken sub-contracting ket makatulong kadagiti empleyado bayat a maur-uray ti panaka-amyendar ti Labor Code.
Innayon ti abogado a maawatanna nga EO ti naipaulog gaputa iti linteg ket awan ti bileg ti presidente a mang-amyendar iti Labor Code gaputa ti laeng Kongreso ti maka-aramid iti nasao a banag.
Inladawanna pay a pakonswelo kadagiti laborers ti nasao nga EO ken agserbi met a warning kadagiti employers tapnu saanda a lisyan dagiti probisyon ti linteg.
Kinunana a nasken a makita met ti Kongreso ti pagkasapulan para iti napartak a panaka-amyendar ti Labor Code nangruna ta napartak ti panagdur-as ken modernisasyon iti pagilian.
