BAGUIO CITY – Imbilin ti Korte Suprema ti pannakaikkat iti serbisyo ti maysa a clerk ti Municipal Trial Court in Cities – Branch 1 ditoy siudad ti Baguio.
Sigun iti korte, napaneknekanda a guilty ni Lourdes Caoili iti grave misconduct ken conduct unbecoming of a court personnel kalpasan a mapapati nga immawat daytoy iti pasuksok kasukat ti pabor iti maysa nga indibidual.
Gapu iti daytoy ket imbilin metlaeng ti korte ti saan a panangawat ti aniaman nga opisina wenno ahensya ti gobyerno kenni Caoili ken ti panaka-forfeit ti amin a benipisyo daytoy.
Nagramot ti kaso iti reklamo da Maria Magdalena Joven, Jose Raul Joven ken Nona Catharina Joven-Carnacete gapu iti panangipaay ni Caoili iti dokumento kenni Margarita Cecilia Rillera.
Inaramat ni Rillera ti nasao a dokumento kas ebidensya kontra kadagiti tallo a nagreklamo.
Naduktalan a nangala pay ni Caoili iti abogado para kenni Rillera kasukat ti kuarta ken ti panagbalin a sekretarya ni Rillera ti anak ti nasao a clerk.
