BAGUIO CITY – Agtultuloy ti panagpabakuna kontra iti COVID-19 dagiti pulis iti Rehiyon Cordillera.
Maibasar iti datus ti Police Regional Office Cordillera (PROCOR) idi Agosto 18, dumanonen iti 10,058 a pulis iti rehion ti nabakunaan kontra iti COVID-19.
Bukbuklen daytoy ti 1,685 a fully vaccinated ken 8,373 a nakaawat ti first dose.
Nailista ti Baguio City Police Office ti kangatuan a bilang dagiti pulis a fully vaccinated a dumanon iti 1,169 bayat a nailista ti Abra PPO ti kangatuan a bilang dagiti pulis a nakaawat iti first dose ti bakuna kontra iti COVID-19 a dumanon iti 1,752.
Sigun kenni P/Capt. Marnie Abellanida, panakangiwat ti PROCOR, adda latta dagiti sumagmamano a pulis iti rehion nga agkedked nga agpabakuna isut gapuna nga agtultuloy latta ti information dissimination nga isaysayangkatda.
Nupay kasta, tinagiragsakna met ti nangato latta nga acceptance rate dagiti pulis iti bakuna kontra iti COVID-19.
