BAGUIO CITY – Agtultuloy ti panakabakuna dagiti senior citizens ditoy siudad ti Baguio kontra iti COVID-19 babaen iti Sinovac vaccine kalpasan a narugian daytoy idi kalman.
Sigun kenni Dr. Elvira Belingon, puntiryada a mabakunaan ti nasurok 400 a senior citizens ita nga aldaw manipud kadagiti barangay a saksakupen ti District Health Centers ti Quirino Hill, Aurora Hill ken Campo Filipino.
Imbinglayna iti panakiyuman ti Bombo Radyo Baguio a naannayas met ti panagbakunada kadagiti senior citizens malaksid laeng dagiti sumagmamano a senior citizens a saanda nga improseso gapu iti nangato a blood pressure ken dadduma a kondisyon dagitoy.
Nupay kasta, kinunana a mabakunaan latta met dagiti saan a nabakunaan a senior citizens la ketdi adda ti sumangpet manen a suplay ti bakuna.
Dinakamatna met a lima kadagitoy ti nakapasar iti epekto kas iti panagngato ti blood pressure ken panaka-ulaw bassit ngem nabantayan ken naipasigurado ti salun-at dagitoy sakbayda a napaawid.
Sigun pay kenni Dr. Belingon, ti kaubingan a nabakunaanda ket ag-
sesenta kalpasan ti makalawas bayat a ti kataengan ket agtawen ti ochenta’y ocho.
Manamnama a maawat dagitoy ti maikadua a dose ti bakunada kontra iti COVID-19 kalpasan ti makabulan.
Imbalakadna met kadagiti senior citizens ti panangituloyda nga agtumar ti maintenance medicine ken iti dagusda a panagkonsulta iti health center no adda ti mariknada a naidumduma iti bagi dagitoy.
