BAGUIO CITY – Insingasing ti National Economic Zone Authority (NEDA) ti panangbukelen ti lokal a gobyerno ti siudad ti Baguio iti Transport Master Plan.
Sigun kenni NEDA – Cordillera Regional Director Milagros Rimando, babaen iti daytoy ket naan-anayen a mapapintas ti sektor ti transportasyon ditoy lokalidad ken marisut ti parikut iti nailet a trapiko ken kurang a pagparadaan iti siudad.
Kinunana nga ado ti naawatda a rekomendasyon para iti panakapapintas ti kasaad ti transportasyon iti lokalidad.
Dinakamatna a karaman ditoy ti singasing nga Automated Guideway Transit babaen iti Department of Science and Technology a maipasdek manipud munisipyo ti La Trinidad agingga ditoy siudad ti Baguio.
Nupay kasta, kinunana nga agbirbirukda paylaeng iti pondo para iti pannakaileppas ti feasibility study para iti nasao a pakaseknan.
Innayonna nga adda metlaeng ti impanamnama ti gobyerno ti Russia a mangipasdek dagitoy iti Rail Transit System ditoy siudad ngem manarimaan paylaeng ti koordinasyon ti Russia iti nasyonal a gobyerno ti Pilipinas.
Sigun pay kenni Rimando, adda pay ti maysa a kompanya a nangisingasing iti panakaipasdek ti cable car ditoy City of Pines.
