BAGUIO CITY- Pagparparikutan dagiti mannalon iti probinsia ti Benguet ken Montañosa ti panakalusaw wenno panakadadael dagiti mula dagitoy a nateng ita a panagtutudo.
Sigun kenni Agot Balanoy, panakangiwat ti liga dagiti asosasyon iti La Trinidad Vegetable Trading Post, tunggal agsasaruno ti aldaw a panagbayakabak ti tudo ket apiten a dagus dagiti mannalon dagiti mula dagitoy a nateng, nangruna dagiti nalaka a dadael.
Kinunana a gapu iti nalaka a panaglusaw dagiti nateng ket agkonkontrol met ita dagiti buyers iti kaadu dagiti gatgatangenda a nateng.
Inlawlawagna a no adu unay ti gatangen dagiti buyers ken no isalogda dagitoy sadiay Metro Manila ket nalaka a malusaw dagiti nateng a rason met tapnu malugi dagitoy.
Innayonna a maysa a rason iti kontrolado a panaggatang dagiti buyers kadagiti nateng iti trading post ket ti saan unay a napintas wenno matumal a gagatangan sadiay Metro Manila.
